Լոռու մարզի Ալավերդի խոշորացված համայնքի Մադան թաղամաս տանող ճանապարհին գտնվող կենցաղային թափոնների աղբավայրը երեք օր շարունակ այրվում է։ Հրդեհը մինչ այսօր մեկուսացնել չի հաջողվել։ ԱԻՆ Ալավերդու հրշեջ-փրկարարական ջոկատը երկու օր շարունակ փորձել է մարել կրակը, բայց ապարդյուն։
Սահմանվել է շուրջօրյա հերթապահություն՝ հրդեհի ընդլայնումը վերահսկելու նպատակով։ Ալավերդու կոմունալ տնտեսության մասնագետները ենթադրում են, որ ձմռան այս եղանակին աղբավայրում հրդեհի բռնկման պատճառը կարող է լինել բնակիչների վառարանների մնացորդները։
Մադան թաղամասի բնակիչներն էլ նշում են, որ աղբի ինքնայրումից բռնկումներ պարբերաբար տեղի են ունենում՝ բողոքելով տարածվող գարշահոտից։
Հրդեհը մարելուց հետո կրկին աղբավայրը հողով կծածկվի,- նշում է Ալավերդի համայնքի կոմունալ տնտեսության ճարտարագետ Էդիկ Էվոյանը։
Աղբավայրը զբաղեցնում է 4,6 հա հողատարածք, սպասարկում է ներկայիս Ալավերդի և Թումանյան խոշորացված համայնքները։
Դեռ երեք տարի առաջ բռնկված հրդեհից հետո հողային ծածկույթ է լցվել աղբավայրի վրա , որը Մ-6 միջպետական ճանապարհի վերանորոգումից ավելացած հողային զանգվածից է օգտագործվել։
Ըստ Ալավերդու համայնքապետ Արկադի Թամազյանի՝ խնդրի լուծումը աղբի տեսակավորումն է։
