«Սպառողի օգնական» հարթակի միջոցով Մրցակցության և սպառողների շահերի  պաշտպանության հանձնաժողով են ստացվել մի շարք բողոքներ այն մասին, որ Երևան քաղաքի Գրիբոյեդովի փողոցի N 48 հասցեում կառուցվող բազմաբնակարան շենքային համալիրի առաջին փուլի բնակարանները ապահովված չեն գազիֆիկացման հնարավորությամբ։

Այս մասին հաղորդագրություն է տարածել ՀՀ մրցակցության և սպառողների շահերի պաշտպանության հանձնաժողովը։

Կառուցապատող «ՕՐԴ Դեվելոփմենթ» ընկերության  նկատմամբ վարույթ է հարուցվել, ի թիվս այլնի, շենքային համալիրի գազիֆիկացման չապահովման փաստի առնչությամբ։ 

Վարույթի ընթացքում Ընկերությունը քայլեր է ձեռնարկել գազիֆիկացման իրականացման ուղղությամբ, սակայն հետագայում պարզվել է, որ ներտնային գազիֆիկացման հնարավորության ապահովման համար գնորդներից պահանջել է յուրաքանչյուր բնակարանի հաշվով հավելյալ վճարել 357 000 ՀՀ դրամ։

Արդյունքում Հանձնաժողովն արձանագրել է, որ ընկերության վարքագիծը պարունակում է սպառողների շահերը խախտող գործելակերպի հատկանիշներ՝ հանձնարարելով անհապաղ և առանց գնորդներից որևէ վճար գանձելու ապահովել բնակարանների ներտնային գազիֆիկացման գործընթացի իրականացումը, ինչպես նաև նրանց վերադարձնել արդեն իսկ գանձված գումարները։

Հիշեցնենք, «Կոմիտաս պարկ» նորակառույց թաղամասի բնակիչները օրեր առաջ Կառավարության շենքի մոտ բողոքի ակցիա են իրականացրել, պահանջելով կանխել կառուցապատողի հարկադրանքն ու պաշտպանել իրենց շահերը։ Նշում էին, որ կառուցապատող «Օրդ դեվելոփմենթ» ընկերությունն բնակիչներից պահանջում էր 357.000-ական դրամ՝ գազի բաժանորդ դառնալու տեղեկանքի դիմաց։