2025 թվականի դեկտեմբերին տեխնոլոգիական միլիարդատեր Իլոն Մասկը Սպիտակ տանը փակ հանդիպում է ունեցել ԱՄՆ նախագահ Դոնալդ Թրամփի հետ։ Ինչպես հայտնում է Time ամսագիրը (վկայակոչելով Meduza-ն), հանդիպման ընթացքում Թրամփը մի քանի ժամ շարունակ հարցեր է ուղղել Մասկի ստեղծած Grok նեյրոցանցին՝ փորձելով պարզել դրա կարծիքը իր նախագահության և թողած ժառանգության վերաբերյալ։
Մասնավորապես, ԱՄՆ նախագահին հետաքրքրել է, թե ինչպես կարձագանքի Վենեսուելայի ժողովուրդը, եթե Միացյալ Նահանգները ձերբակալի երկրի ղեկավար Նիկոլաս Մադուրոյին։ Grok-ը Մադուրոյին բնութագրել է որպես ծայրաստիճան անժողովրդական բռնապետ և նշել, որ վենեսուելացիների մեծ մասը, ամենայն հավանականությամբ, կողջունի նրա տապալումը։ Time-ի աղբյուրների փոխանցմամբ՝ այս զրույցից հետո Թրամփը հանգել է այն եզրակացության, որ Grok-ը հանճարեղ համակարգ է։
Հատկանշական է, որ արդեն 2026 թվականի հունվարի 3-ին ԱՄՆ-ը ռազմական հատուկ գործողություն իրականացրեց Վենեսուելայում։ Ամերիկյան ուժերը երկրից հեռացրին Նիկոլաս Մադուրոյին ու նրա կնոջը՝ Սելիա Ֆլորեսին, և տեղափոխեցին Նյու Յորք, որտեղ նրանց մեղադրանքներ առաջադրվեցին մի շարք ծանր հոդվածներով, այդ թվում՝ թմրանյութերի ապօրինի շրջանառության և ահաբեկչության հատկանիշներով։
Time-ի հետ զրույցում Թրամփը Վենեսուելայի դեպքը նշել է որպես օրինակ այն բանի, թե ինչպես կարող է ուժի ցուցադրումը ծառայել ԱՄՆ շահերին․ արդյունքում Վաշինգտոնին հաջողվել է զգալիորեն ամրապնդել իր դիրքերն ու ազդեցությունը Կարակասում։
