Պաղեստինյան շրջափակված անկլավում ջրի որակն արդեն իսկ վատթարացել է․ հեղեղումները կխորացնեն հիվանդությունների տարածումը և սպառնալիքը առողջապահությանը, հայտնում է ՄԱԿ-ի գործակալությունը։

Ձմռան և ցուրտ անձրևների մոտենալը ավելի կխորացնի հանրային առողջապահական ճգնաժամը, որն արդեն իսկ պատել է շրջափակված Գազայի հատվածը, զգուշացնում է Առողջապահության համաշխարհային կազմակերպությունը (ԱՀԿ)։

Ջրի վերջին հետազոտությունները ցույց են տվել պաղեստինյան անկլավում ջրի որակի ակնհայտ վատթարացում, իսկ փորլուծության  դեպքերը կտրուկ աճել են, երեքշաբթի հայտնել է ՄԱԿ-ի առողջապահական գործակալությունը՝ նշելով, որ ձմռան մոտենալը սպառնում է ավելի սրել իրավիճակը:

Գազայի մեծ մասը ավերվել է Իսրայելի ցեղասպանական պատերազմի ընթացքում և շարունակում է մնալ շրջափակման մեջ, ինչի հետևանքով բնակչության մեծ մասը զրկված է պատշաճ կացարանից և կանգնած է գործող ենթակառուցվածքների բացակայության փաստի առջև:

«Քանի դեռ մենք չենք կարողանում մարդկանց ապահովել ջրի նվազագույն քանակով, ջրի որակը և աղտոտվածությունը մնում են առաջնային խնդիր», - ասել է Պաղեստինյան տարածքներում ԱՀԿ ներկայացուցիչ Ռեյնհիլդե Վան դե Վեերդտը:

Ձմեռային անձրևներից առաջացող հնարավոր հեղեղումները «կոյուղաջրերը, թափոնները և աղտոտված ջուրը կլցնեն այն վայրերը, որտեղ մարդիկ քնում են, պատրաստում և հոգ տանում իրենց հարազատների մասին», զգուշացրել է նա:

2026 թվականի առաջին ութ ամիսների ընթացքում ջրի շուրջ 6,700 նմուշների հետազոտությունը ցույց է տվել, որ «մանրէաբանական աղտոտվածությունը գրեթե եռապատկվել է», Ժնևում լրագրողներին հայտնել է նա՝ խոսելով Գազայից:

Թեստերը ցույց են տվել, որ աղտոտվածությունը հունվարի 6 տոկոսից ցածր ցուցանիշից օգոստոսին հասել է ավելի քան 18 տոկոսի:

Սուր փորլուծության դեպքերը մարտ ամսից ի վեր գրեթե կրկնապատկվել են՝ շուրջ 27,000-ից հասնելով ավելի քան 48,000-ի, նշել է Վան դե Վեերդտը:

Այնուամենայնիվ, ԱՀԿ պաշտոնյան ընդգծել է, որ դեռ ժամանակ կա հանրային առողջապահական աղետը կանխելու համար: Նա կոչ է արել «հումանիտար բեռների անխափան և արագացված մուտք ապահովել»։

Նրա խոսքով՝ կենսական նշանակություն ունեն մշտական կացարանների, ջրամատակարարման և թափոնների կառավարման կայուն համակարգերի համար անհրաժեշտ նյութերը: Հիվանդությունների պատճառները պարզելու և բռնկումներին ավելի լավ արձագանքելու համար շտապ անհրաժեշտ են նաև լաբորատոր լրացուցիչ նյութեր:

Իսրայելը Գազայում ջրի հասանելիությունն օգտագործում է որպես «զենք», ապրիլին հայտարարել էր «Բժիշկներ առանց սահմանների» կազմակերպությունը: Խումբը վկայակոչել էր ՄԱԿ-ի, Եվրոպական Միության և Համաշխարհային բանկի տվյալները, համաձայն որոնց՝ Իսրայելը ոչնչացրել կամ վնասել է տարածքի ջրամատակարարման և սանիտարական ենթակառուցվածքների մոտ 90 տոկոսը:

 

Աղբյուրը՝ Al Jazeera