Ռուսաստանի նախագահ Վլադիմիր Պուտինը և Հայաստանի վարչապետ Նիկոլ Փաշինյանը Բիշքեկում կքննարկեն ԵՄ-ի և ԵԱՏՄ-ի միջև ընտրության վերաբերյալ հանրաքվե անցկացնելու հարցը, հայտարարել է ՌԴ նախագահի մամուլի քարտուղար Դմիտրի Պեսկովը։
«Նախագահը, բնականաբար, կօգտագործի այս հանդիպումը՝ ևս մեկ անգամ ներկայացնելու մեր փաստարկները։ Բայց մենք չենք կարող հայերից ավելի հայ լինել։ Իհարկե, իրենց ճակատագրի վերաբերյալ որոշումը պետք է կայացնեն հենց հայերը։ Մենք էլ առաջարկում ենք դա անել՝ հանրաքվե անցկացնել», - ասել է Պեսկովը՝ պատասխանելով հարցին, թե արդյոք հանդիպումը կարող է «կասեցնել Հայաստանի հեռացումը Ռուսաստանից»։
Պեսկովի խոսքով՝ Հայաստանում հանրաքվե անցկացնելու առաջարկ են արել նաև ԵԱՏՄ անդամ երկրների ղեկավարները։ Նրանք համապատասխան հայտարարություն են ընդունել Աստանայում վերջերս կայացած գագաթնաժողովում։
Պուտին-Փաշինյան առաջիկա հանդիպման օրակարգին օրերս անդրադարձել է նաև ՌԴ նախագահի օգնական Յուրի Ուշակովը։ Նա հայտարարել է, որ Կրեմլին «մտահոգում են Հայաստանում ընդդիմադիր առաջնորդների զանգվածային ձերբակալությունները»՝ ընդգծելով, որ խոսքը Ռուսաստանի հետ ավանդական բարիդրացիական հարաբերությունների ամրապնդման կողմնակից քաղաքական գործիչների մասին է։
Օգոստոսի 31-ից սեպտեմբերի 1-ը Ղրղզստանում կանցկացվի Շանհայի համագործակցության կազմակերպության (ՇՀԿ) գագաթնաժողովը, որին կմասնակցեն Չինաստանի նախագահ Սի Ծինփինը, Հնդկաստանի վարչապետ Նարենդրա Մոդին, Բելառուսի նախագահ Ալեքսանդր Լուկաշենկոն, Իրանի նախագահ Մասուդ Փեզեշքիանը, Ղազախստանի նախագահ Կասիմ-Ժոմարտ Տոկաևը, Պակիստանի վարչապետ Շահբազ Շարիֆը, Տաջիկստանի նախագահ Էմոմալի Ռահմոնը, Ուզբեկստանի նախագահ Շավքաթ Միրզիյոևը, Ադրբեջանի նախագահ Իլհամ Ալիևը, Հայաստանի վարչապետ Նիկոլ Փաշինյանը, Թուրքիայի նախագահ Ռեջեփ Թայիփ Էրդողանը և այլ առաջնորդներ։
