Իսպանիան ֆուտբոլի 2026 թվականի աշխարհի չեմպիոնն է։ ԱԱ-2026-ի եզրափակիչ հանդիպումը, որում «Ֆուրիա ռոխան» միայն լրացուցիչ ժամանակում կարողացավ կոտրել Արգենտինայի հավաքականի դիմադրությունը, կայացավ New York New Jersey (MetLife) մարզադաշտում։ Խաղի ընդմիջումը տևեց սովորականից երկու անգամ երկար՝ մոտ կես ժամ՝ ԱՄՆ-ում հանրահայտ Սուպերբոուլի (Super Bowl) ոճով երաժշտական շոուի պատճառով:

Իսպանացիները խաղային առավելությանը տիրեցին եզրափակչի առաջին իսկ րոպեներից. Արգենտինան գործում էր հակագրոհներով՝ հույսը դնելով եզրերի արագության և իրենց առաջատար Լիոնել Մեսսիի՝ գծերի միջև կատարած փոխանցումների վրա: Սակայն հանդիպման բոլոր վտանգավոր պահերը ստեղծվեցին միայն Էմիլիանո Մարտինեսի դարպասի մոտ. իրենց հնարավորություններն ունեցան Լամին Յամալը, Միկել Օյարսաբալը, Մարկ Կուկուրելյան, Դանի Օլմոն, Ֆեռան Տորեսը, Նիկո Ուիլյամսը և Միկել Մերինոն: Բայց հարվածներից մի քանիսն անցնում էին դարպասաձողի կողքով, իսկ մյուս դրվագներում արգենտինացիներին փրկում էր պաշտպանությունը կամ դարպասապահը: Մարտինեսը փրկեց իր հավաքականին պարտությունից հանդիպման փոխհատուցված ժամանակի վերջին վայրկյաններին՝ հետ մղելով տուգանայինից Յամալի՝ դեպի դարպասի անկյունը կատարած դիպուկ հարվածը:

Մեսսիի թիմը մրցակցի դարպասին իր առաջին հարվածը հասցրեց միայն հանդիպման 75-րդ րոպեին, ինչն աշխարհի առաջնությունների եզրափակիչների պատմության մեջ վատագույն ցուցանիշն է: Արգենտինացիների հաճախակի չափազանց կոպիտ խաղը հանգեցրեց մի քանի դեղին քարտերի, իսկ խաղի փոխհատուցված ժամանակի 3-րդ րոպեին դաշտի կենտրոնում կոպիտ ֆոլի համար հեռացվեց Էնցո Ֆերնանդեսը: Հիմնական ժամանակը չորոշեց հաղթողին, և արգենտինացիները լրացուցիչ ժամանակ դուրս եկան փոքրամասնությամբ:

«Ֆուրիա ռոխային» հաջողվեց խփել միակ հաղթական գոլը միայն երկրորդ լրացուցիչ ժամանակի երկրորդ րոպեին. Նիկո Ուիլյամսի՝ գլխով կատարած փոխանցումից հետո դիպուկ և ուժգին հարվածով աչքի ընկավ իսպանացիների հարձակվող Ֆեռան Տորեսը: Մինչ ԱԱ-2026-ում հաղթելը, այս թիմը աշխարհի լավագույնն էր դարձել միայն մեկ անգամ՝ 2010 թվականին Հարավաֆրիկյան Հանրապետությունում կայացած աշխարհի առաջնությունում։