Խոշոր և հզոր թայֆունը ուրբաթ օրը մոտեցել է Ճապոնիայի հարավ-արևմուտքում գտնվող հեռավոր կղզեխմբին, ինչը դրդել է իշխանություններին նախազգուշացնել կատաղի քամիների, տեղատարափ անձրևների, սողանքների և հեղեղումների մասին։ Սա կարող է դառնալ տարածաշրջանի վերջին տարիների ամենավերացուցիչ փոթորիկը։

Օդերևութաբանական ծառայությունների տվյալներով՝ ակնկալվում է, որ «Բավի» թայֆունը շաբաթ օրը վաղ առավոտյան շատ մոտ կանցնի Սակիսիմա կղզիներով, որոնք Թայվանի մոտ գտնվող և Օկինավա պրեֆեկտուրայի մաս կազմող հեռավոր կղզիներ են։ Քամու առավելագույն արագությունը հասնում է 162 կմ/ժ-ի։ Կղզեխմբի կղզիներից մեկի՝ Իշիգակիի բնակիչները ժապավեններով ամրացնում են պատուհանները և քամուց պաշտպանող ցանցեր քաշում տների ու խանութների վրա։

Ավիաընկերությունները տարածաշրջանում տասնյակ չվերթներ են չեղարկել։ Japan Airlines-ը հայտնել է ուրբաթ և շաբաթ օրերի ավելի քան 100 չվերթի չեղարկման մասին, ինչը ազդել է գրեթե 20,000 ուղևորի վրա։ Մրցակից All Nippon Airways ավիաընկերությունը մինչև կիրակի չեղարկել է ավելի քան 160 չվերթ՝ խաթարելով մոտ 20,000 մարդու ճամփորդություն։ Օկինավա պրեֆեկտուրայում գրեթե 900 շենք մնացել է առանց էլեկտրականության։ Հանրաճանաչ տուրիստական ուղղություն համարվող Իշիգակիում բնակիչները պաշարներ են հավաքում՝ դատարկելով սուպերմարկետների արագ պատրաստվող լապշայի դարակները։ Հանրային լողափերը, ափամերձ այգիներն ու տեղական լաստանավային տերմինալը փակ են։ Տեղական տրանսպորտային հաղորդակցության դադարեցման պատճառով զբոսաշրջիկները ստիպված են եղել երկարաձգել իրենց կեցությունը կղզում։

Թայվանը պատրաստվում է առատ տեղումների

Հարևան Թայվանում ֆինանսական շուկաները փակվել են, իսկ հյուսիսային և արևելյան շրջանների մեծ մասում հայտարարվել է ոչ աշխատանքային օր։ Տայբեյի քաղաքային իշխանությունները հատուկ կետեր են ստեղծել, որտեղից բնակիչները կարող են ավազով պարկեր վերցնել։ Չնայած չի ակնկալվում, որ «Բավի»-ն ցամաք դուրս կգա Թայվանում, այնուամենայնիվ, ուրբաթ ուշ երեկոյան սկսած՝ այն կղզում հսկայական քանակությամբ անձրևներ կբերի․ որոշ շրջաններում տեղումների մակարդակը կարող է հասնել մինչև մեկ մետրի։

Կառավարությունը հայտնել է, որ ավելի քան 2,000 մարդ է տարհանվել, հիմնականում՝ լեռնային արևելյան ափից, և գրեթե 29,000 զինվորական պատրաստության վիճակում է՝ օգնություն ցուցաբերելու համար։ «Թեև թայֆունը մի փոքր թուլացել է և դասակարգվել որպես չափավոր, դրա շառավիղը մեծ է, և այն դեռ կարող է ուժեղ քամիներ ու տեղատարափ անձրևներ բերել բազմաթիվ շրջաններին»,- իր ֆեյսբուքյան էջում գրել է Թայվանի նախագահ Լայ Չինգ-տեն։

Թայվանյան ավիաընկերությունները շաբաթ օրվա համար չեղարկել են Տաոյուանի հիմնական միջազգային օդանավակայանի բոլոր չվերթները։ Հոնկոնգի առաջատար Cathay Pacific Airways ավիաընկերությունը նույնպես չեղարկել է հանգստյան օրերի թռիչքները Հոնկոնգի և Թայվանի միջև, ինչպես նաև մի քանի չվերթներ դեպի Չինաստանի արևելյան ափամերձ քաղաքներ՝ Հանչժոու, Նինբո և Ֆուչժոու։ Չիպերի արտադրության համաշխարհային հսկա TSMC-ն հայտարարել է, որ հունիս ամսվա վաճառքների տվյալների հրապարակումը ուրբաթ օրվանից տեղափոխում է երկուշաբթի։

Շաբաթ ուշ երեկոյան կամ կիրակի վաղ առավոտյան կանխատեսվում է, որ «Բավի» թայֆունը ցամաք դուրս կգա Չինաստանի արևելյան Վենչժոու քաղաքի շրջանում, որն ունի 10 միլիոն բնակիչ։ Տեղի ձկնորսները հայտնում են, որ հարակից գյուղերի բոլոր նավերն արդեն վերադարձել են նավահանգիստ, և բոլորը պատրաստվում են մոտեցող տարերքին։