Ռումինիայի և Ավստրիայի կողմից կազմակերպված գլոբալ գործողության արդյունքում մի քանի մայրցամաքներում ձերբակալվել են մարդկանց առևտրով զբաղվող անձինք։ Հայտնաբերվել է ավելի քան 2000 զոհ, որոնցից մի քանիսը հարկադրվել են մարմնավաճառությամբ զբաղվել։
Մարդկանց թրաֆիքինգի միջազգային ցանցերի դեմ ուղղված լայնածավալ գործողության շրջանակներում 59 երկրների ոստիկանությունը ողջ աշխարհում ձերբակալել է ավելի քան 1000 մարդու: Ձերբակալությունները տեղի են ունեցել 5 օրվա ընթացքում Աֆրիկայում, Հյուսիսային և Հարավային Ամերիկայում, Եվրոպայում և Ասիայում,- ասված է Ինտերպոլի մամուլի հաղորդագրության մեջ, որը հրապարակվել է երկուշաբթի՝ հուլիսի 6-ին,- գրում է DW ռուսական ծառայությունը։
«Գլոբալ շղթա» կոդային անվանումով գործողությունը կազմակերպվել է Ռումինիայի և Ավստրիայի իշխանությունների կողմից՝ Ինտերպոլի, Եվրոպոլի, Ամերիպոլի և Եվրոպական սահմանային «Ֆրոնտեքս» գործակալության համակարգմամբ:
Ինտերպոլի տվյալներով՝ բացահայտվել է ավելի քան 2000 զոհ, այդ թվում՝ մարմնավաճառության, մուրացկանության և նույնիսկ հանցավոր գործունեության հարկադրված անձինք։
Զոհերի մեծ մասը Արգենտինայի, Կոլումբիայի, Վենեսուելայի, Մոլդովայի և Նեպալի քաղաքացիներ են։ Նրանց 10 %-ը անչափահասներ են։ Հանցագործները թիրախավորել են խոցելի խմբերին։ Խաբեության կամ հարկադրանքի միջոցով նրանք մարդկանց ուղարկել են այլ երկրներ, նույնիսկ այլ մայրցամաքներ,- ասվում է Ինտերպոլի մամուլի հաղորդագրության մեջ։
Մասնավորապես, Բրազիլիայում բացահայտվել է միջազգային հանցավոր ցանց, որը մարդկանց ուղարկել է Կամբոջա, որտեղ նրանց ստիպված են եղել աշխատել առցանց խարդախության կենտրոններում։ Բելգիայում ձերբակալվել է 17 մարդ, որոնք կասկածվում էին անչափահասներին առցանց հավաքագրելու և այնուհետև Բելգիայում և Ֆրանսիայում մարմնավաճառության հարկադրելու մեջ։
Ինտերպոլը հայտարարել է, որ մարդկանց թրաֆիքինգը մնում է աշխարհում կազմակերպված հանցավորության ամենաշահութաբեր և տարածված ձևերից մեկը։ «Մեր արձագանքը պետք է լինի հավասարապես գլոբալ, համակարգված և անզիջում», - նշել են կազմակերպությունում։
DW ռուսական ծառայություն
