Հարավային Եվրոպայի վեց երկրներում անտառային հրդեհներ են։ DW-ի հաղորդմամբ՝ Հարավային Եվրոպայում կիրակի հրշեջները պայքարել են մի քանի անտառային հրդեհների դեմ, իսկ Ֆրանսիայի հարավ-արևմտյան իշխանությունները զգուշացրել են, որ մեկ հրդեհը կարող է հանգեցնել «Տուր դը Ֆրանս» հեծանվային մրցաշարի մասնակի չեղարկման։

«Հարավային Եվրոպայի վեց երկրներ տուժել են անտառային հրդեհներից: Իշխանությունները զգուշացնում են, որ հրդեհներից մեկը, որը բռնկվել է Ֆրանսիայի հարավ-արևմուտքում, կարող է ազդել երկուշաբթի օրը կայանալիք «Տուր դը Ֆրանս» (Tour de France) հեծանվավազքի երրորդ փուլի վրա:

Այս ամառ Եվրոպական միությունը ավելի շատ հրշեջներ և հրդեհաշեջ ինքնաթիռներ է տեղակայում Հարավային Եվրոպայում:

Հարավային Եվրոպայի հրշեջները կիրակի օրը պայքարել են մի քանի անտառային հրդեհների դեմ, ընդ որում՝ Ֆրանսիայի հարավ-արևմուտքի իշխանությունները զգուշացրել են, որ հրդեհներից մեկը կարող է հանգեցնել «Տուր դը Ֆրանսի» մասնակի չեղարկմանը:

Հրդեհների մասին հաղորդվել է նաև Պորտուգալիայում, Հունաստանում, Իսպանիայում և Բալկաններում՝ հենց այն ժամանակ, երբ ամառային զբոսաշրջային սեզոնը թեժ փուլ է թևակոխում: Եվրոպացի քաղաքականություն մշակողները զգուշացրել են այս տարի անտառային հրդեհների չափազանց մեծ վտանգի մասին, հատկապես հուլիս և օգոստոս ամիսներին: Եվրոպայի տապը. վատթարագույնը դեռ առջևում է:

Անտառային հրդեհը կարող է փոխել «Տուր դը Ֆրանսի» երթուղին

Ֆրանսիայի իշխանությունները հայտարարել են, որ մինչև կիրակի օրվա վերջ կորոշեն՝ չեղարկել «Տուր դը Ֆրանսի» երրորդ փուլը, թե ոչ, այն բանից հետո, երբ անտառային հրդեհը մոլեգնել է երթուղուց մոտ 60 կիլոմետր (37 մղոն) հեռավորության վրա:

Պիրենեյ-Օրիենտալ դեպարտամենտի Տրևիլյակ քաղաքում հրդեհը բռնկվել է շաբաթ օրը, ինչի հետևանքով երկու մարդ՝ հրշեջն ու տեղի բնակիչը, հիվանդանոցում հայտնվել են կյանքին սպառնացող ծանր վիճակում: Մոտ 750 հրշեջ, 200 մեքենա և 9 հրդեհաշեջ ուղղաթիռ ու այլ օդանավեր են ներգրավվել հրդեհը մեկուսացնելու համար, որի առաջնագիծը, պաշտոնյաների խոսքով, ձգվում է 18 կիլոմետր: Հեծանվորդները պետք է երկուշաբթի օրը հատեն Պիրենեյների Լեզ Անգլ (Les Angles) քաղաքի վերջնագիծը, և մրցավազքի կազմակերպիչները հուսով են, որ անհրաժեշտության դեպքում երթուղին հնարավոր կլինի հարմարեցնել:

Շուրջ 300 հրշեջ պայքարել է մեկ այլ հրդեհի դեմ Ֆրանսիայի հարավ-արևելյան Դրոմ դեպարտամենտի լեռնային շրջանում:

Պիրենեյներում անտառային հրդեհը բռնկվել է շաբաթ օրը՝ երկնակամարը ներկելով նարնջագույնով:

Պորտուգալիան օգնություն է կանչում Իսպանիայից և Իտալիայից

Միևնույն ժամանակ, երկրի Քաղաքացիական պաշտպանության ծառայության տվյալներով, հինգշաբթի օրվանից Պորտուգալիայի կենտրոնական Վուզելա շրջանում մոլեգնող անտառային հրդեհն այրել է 12,000 հեկտար (30,000 ակր) տարածք: Ավելի քան 1,200 հրշեջ աշխատել է հրդեհը մարելու ուղղությամբ՝ մոտ 400 մեքենաների և 15 օդանավերի հետ միասին: Կիրակի կեսօրին հրդեհը որոշակիորեն մեկուսացվել էր, և տեղական լրատվամիջոցներում վկայակոչված պաշտոնյաները նշում էին, որ որոշ թեժ կետեր դեռ պահպանվում են:

Իսպանիան ուրբաթ օրը լրացուցիչ անձնակազմ և մեքենաներ է ուղարկել Պորտուգալիա՝ երկու հրդեհաշեջ ինքնաթիռների հետ միասին: Իտալիան նույնպես ուղարկել է երկու հրդեհաշեջ օդանավ:

Հազարավոր մարդիկ տարհանվել են Իսպանիայում մոլեգնող հրդեհի պատճառով

Իսպանիայի հյուսիս-արևելյան Ժիրոնա տարածաշրջանում ուրբաթ օրվանից մոլեգնող անտառային հրդեհը ոչնչացրել է մոտ 2,200 հեկտար (5,400 ակր) հողատարածք, հայտնում է EFE լրատվական գործակալությունը: Տեղի հրշեջ ծառայության պաշտոնյան հայտարարել է, որ հնարավոր է՝ կիրակի օրը չհաջողվի հրդեհը վերահսկողության տակ առնել: Մոտակայքում բնակվող գրեթե 50,000 մարդու հրահանգվել է մնալ փակ տարածքներում կամ նրանք տարհանվել են, հաղորդում են տեղական լրատվամիջոցները: Մեկ տղամարդ բերման է ենթարկվել՝ ճանապարհամերձ աշխատանքների ժամանակ սկավառակային սղոց (բալգարկա) օգտագործելիս անզգուշությամբ հրդեհ բռնկելու կասկածանքով:

Անտառային հրդեհը բռնկվել է Իսպանիայի Կոստա Բրավա հանգստավայրի մոտ, որն արդեն լի է զբոսաշրջիկներով:

Հունաստանի հրդեհների ազդեցությունը զգացվել է Աթենքի և Սալոնիկի մոտակայքում

Հունաստանում կիրակի կեսօրին խոշոր անտառային հրդեհ է բռնկվել մայրաքաղաք Աթենքից արևմուտք: Հաղորդվում է, որ հրդեհը տարածվել է Մանդրա շրջանի սոճու անտառներում: Պաշտոնյաներն ասել են, որ ավելի քան 150 հրշեջ և 22 օդանավ են պայքարում հրդեհի դեմ՝ մասնագիտացված թիմերի և կամավորների հետ միասին:

Հունաստանի երկրորդ ամենամեծ քաղաքի՝ Սալոնիկի որոշ հատվածներում բնակիչներին հրահանգվել է մնալ տանը՝ փակ պահելով պատուհաններն ու դռները, այն բանից հետո, երբ թափոնների վերամշակման գործարանը պատվել է հրդեհով, ինչի հետևանքով թունավոր ծուխ է առաջացել: Ոստիկանությունը ձերբակալել է 76-ամյա մի տղամարդու, ով կասկածվում է իր մեքենայով կայծեր առաջացնելու և բուսականությունը հրդեհելու մեջ, հայտնել է հրշեջ ծառայությունը: Խոշոր հրդեհների մասին հաղորդվել է նաև խորվաթական Հվար կղզում և Ալբանիայի Տալե քաղաքում:

Հունաստանը դեռ ուշքի չի գալիս անցյալ տարվա մահացու անտառային հրդեհներից, որոնք տեղի ունեցան ռեկորդային ջերմաստիճանի պայմաններում:

ԵՄ-ն ուժեղացնում է անդրսահմանային աջակցությունը

Վերջին տարիներին անտառային հրդեհներն ակտիվացել են ողջ Հարավային Եվրոպայում՝ հրդեհավտանգ սեզոնների երկարացմամբ և ավելի մեծ տարածքների այրմամբ: Այս վերջին հրդեհները տեղի են ունենում այն բանից հետո, երբ Եվրոպայի մեծ մասը տուժել էր վաղ ամառային տապից: Եվրոպական միությունը ուժեղացրել է ջանքերը անտառային հրդեհների սեզոնին պատրաստվելու համար, ընդ որում Եվրահանձնաժողովը՝ ԵՄ գործադիր մարմինը, իրականացրել է 14 երկրների արտակարգ իրավիճակների բրիգադների երբևէ ամենամեծ տեղակայումը: Այս բրիգադները հրդեհաշեջ ինքնաթիռների հետ միասին նախապես տեղակայվել են Կիպրոսի, Հունաստանի, Իտալիայի, Ֆրանսիայի, Իսպանիայի և Պորտուգալիայի բարձր ռիսկային գոտիներում»։