Ֆուտբոլի միջազգային ֆեդերացիան (ՖԻՖԱ) ԱՄՆ նախագահ Դոնալդ Թրամփի զանգից հետո չեղարկել է ԱՄՆ հավաքականի հարձակվող Ֆոլարին Բալոգունին տրված կարմիր քարտը, հայտնում է Reuters-ը։

Բալոգունը կարմիր քարտ էր ստացել Բոսնիա և Հերցեգովինայի հավաքականի դեմ Աշխարհի առաջնության 1/16 եզրափակչի խաղում՝ պաշտպանի նկատմամբ կոպիտ խախտման համար, և հեռացվել էր դաշտից:

Բոսնիա և Հերցեգովինայի նկատմամբ 2:0 հաշվով հաղթանակից հետո ԱՄՆ-ն անցել է 1/8 եզրափակիչ, որտեղ կխաղա Բելգիայի հետ։ Ըստ կանոնակարգի՝ Բալոգունը չէր կարող մասնակցել այդ խաղին. հեռացումն ավտոմատ կերպով ենթադրում է որակազրկում հաջորդ հանդիպման համար։

Այնուամենայնիվ, հանդիպումից հետո Դոնալդ Թրամփը զանգահարել է ՖԻՖԱ-ի նախագահ Ջանի Ինֆանտինոյին և խնդրել վերանայել Բալոգունին ցույց տրված կարմիր քարտի վերաբերյալ որոշումը։

ՖԻՖԱ-ի կարգապահական կոմիտեն կասեցրել է ֆուտբոլիստի որակազրկումը՝ նրա համար սահմանելով մեկ տարվա փորձաշրջան։ «Շնորհակալություն ՖԻՖԱ-ին ճիշտ վարվելու և ակնհայտ անարդարությունը շտկելու համար»,- հայտարարել է Թրամփը։

ԱՄՆ նախագահը և Ինֆանտինոն իսկապես զրուցել են, պատմել է The New York Post-ի աղբյուրը։ Նրա խոսքով՝ Թրամփը ցանկացել է ավելի լավ հասկանալ, թե ինչու է ցույց տրվել կարմիր քարտը և ինչու է հաջորդել որակազրկումը։

Բելգիայի ֆուտբոլի ֆեդերացիան հայտարարել է, որ «ցնցված է ՖԻՖԱ-ի որոշումից», որը «ուղղակիորեն հակասում է 2026 թվականի ֆուտբոլի Աշխարհի առաջնության կանոնակարգին»։