Դատարանի որոշմամբ ԱԺ «Հայաստան» խմբակցության պատգամավոր Իշխան Սաղաթելյանի և նրա կնոջ՝ ավելի քան 258 մլն դրամի գույքի վրա արգելանք դնելուց հետո, նրանց նկատմամբ նախաձեռնվել է երկու քրեական վարույթ՝ արգելանքի տակ գտնվող գույքի նկատմամբ ապօրինի արարքներ կատարելու և հայտարարագիր ներկայացնելուց խուսափելու հատկանիշներով։ Այս մասին հայտնում են Քննչական կոմիտեից։
Այսօր՝ հունիսի 23-ին, Իշխան Սաղաթելյանի բնակության վայրում և կնոջ երկու ավտոմեքենաներում կատարված խուզարկությամբ հայտնաբերվել են արտարժույթի տեսքով դրամական միջոցներ և ոսկյա զարդեր։
«Քննչական կոմիտեում Հարկադիր կատարումն ապահովող ծառայությունից ստացված հաղորդման համաձայն՝ ՀՀ հակակոռուպցիոն դատարանի կողմից 2026-ի հունվարի 5-ին տրված կատարողական թերթով արգելվել է Ի.Ս.-ին և նրա կնոջը՝ իրենց պատկանող գույքերի տնօրինման հետ կապված որևէ գործողություն կատարել: Բացի այդ, դատարանի որոշմամբ 258 մլն 146 հզր 843 ՀՀ դրամի չափով պետք է արգելանք դնել Իշխան Սաղաթելյանին և Լ.Խ.-ին սեփականության իրավունքով պատկանող գույքերի վրա:
Հարուցված կատարողական վարույթի ընթացքում 2026-ի փետրվարի 2-ին Իշխան Սաղաթելյանը հրաժարվել է ներկայացնել «Գույքի, եկամուտների և գույքային իրավունքների, այդ թվում՝ պահանջի իրավունքների կազմի, քանակի և գտնվելու վայրի մասին հայտարարագիր»»,- ասված է ՔԿ հաղորդագրության մեջ։
Կոմիտեցին նշում են, որ 2026-ի ապրիլի 28-ին Իշխան Սաղաթելյանը ներկայացրել է հայտարարագիր, որում ի թիվս այլի նշել է գույք, որը հանդիսանում է պարտադիր առգրավման ենթակա գույք: Տվյալ գույքի վրա դրվել է արգելանք:
Ստացված հաղորդման հիման վրա նախաձեռնվել է քրեական վարույթ՝ արգելանքի տակ գտնվող գույքի նկատմամբ ապօրինի արարք հատկանիշներով:
Բացի այդ, քրեական վարույթի նախաքննության ընթացքում քննիչի կողմից ներկայացված հաղորդման հիման վրա նախաձեռնվել է ևս մեկ քրեական վարույթ՝ պարտապանի կողմից սեփականության իրավունքով իրեն պատկանող գույքի և գույքային իրավունքների կազմի, քանակի և գտնվելու վայրի մասին հայտարարագիր ներկայացնելուց խուսափելու հատկանիշներով: Նշված քրեական վարույթները միացվել են:
Հունիսի 23-ին Իշխան Սաղաթելյանի բնակության վայրում, նրա կնոջը սեփականության իրավունքով պատկանող երկու տրանսպորտային միջոցներում կատարվել է խուզարկություն, որի ընթացքում հայտնաբերվել են արտարժույթի տեսքով դրամական միջոցներ և ոսկյա զարդեր:
Նախաքննությունը շարունակվում է:
