Քննչական կոմիտեն հայտնում է՝ Արթուր Օսիպյանը 2 ամսով կալանավորվել է։

Ըստ Քննչական կոմիտեի՝ Օսիպյանը մարտի 22-ին Ֆեյսբուքի էջում վարչապետի հասցեին բռնություն գործադրելու հրապարակային կոչեր է արել, իսկ մայիսի 18-ին իմանալով ՔՊ-ի նախընտրական քարոզարշավի մասին, գնացել և խոչընդոտել քարոզչության ընթացքը։

Օսիպյանի նկատմամբ քրեական հետապնդում է սկսվել միանգամից երեք հոդվածով՝ Քրեական օրենսգրքի 330-րդ հոդվածի 2-րդ մասի 3-րդ կետով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը), 297-րդ հոդվածի 1-ին մասով (խուլիգանությունը) և 211-րդ հոդվածի 1-ին մասով (քարոզչություն կատարելուն կամ քարոզչություն կատարելուց հրաժարվելուն հարկադրելը կամ քարոզչություն կատարելուն այլ կերպ խոչընդոտելը):

Նախօրեին իրավապաշտպան կազմակերպությունների համատեղ հայտարարություն էին տարածել՝ նշելով, որ Օսիպյանի գործողությունները տեղավորվում են խոսքի ազատության իրավունքի տիրույթում, իսկ իրավապահ համակարգի կողմից կիրառվող կալանքը նպատակ ունի լռեցնել քննադատությունը։