Եվրախորհրդարանի նախագահ Ռոբերտա Մեցոլան արձագանքել է Ադրբեջանի նախագահ Իլհամ Ալիևի այն հայտարարությանը, որով վերջինս Եվրախորհրդարանին քննադատել ու մեղադրել է «հակաադրբեջանական բանաձևեր» ընդունելու մեջ։
Ադրբեջանի նախագահ Իլհամ Ալիևը Երևանում անցկացվող Եվրոպական քաղաքական համայնքի 8-րդ գագաթնաժողովի բացմանը իր ելույթում նախ շնորհակալություն էր հայտնել Եվրահանձնաժողովին՝ վերջինիս դիրքորոշման համար Հայաստան-Ադրբեջան խաղաղության գործընթացի վերաբերյալ, սակայն հավելել, որ եվրոպական ոչ բոլոր կառույցներն են ցուցադրել նույն մոտեցումը, որոնցից մեկը, ըստ Ալիևի, Եվրախորհրդարանն է։
Ադրբեջանի նախագահն ասել է, թե Եվրախորհրդարանը խաղաղությանը նպաստելու փոխարեն, սաբոտաժով է զբաղված՝ հիշեցնելով, որ 2021 թվականի մայիսից մինչև 2026 թվականի ապրիլի 30-ը «Եվրախորհրդարանը 14 բանաձև է ընդունել, որոնք շատ վիրավորական կերպով ստում են Ադրբեջանի մասին»։ Ալիևն անդրադարձել էր Եվրախորհրդարանի կողմից օրերս ընդունված բանաձևին, որով վերջինս աջակցություն էր հայտնում Հայաստանի ժողովրդավարական դիմակայունությանը։ Բանաձևում անդրադարձ կար նաև Լեռնային Ղարաբաղից տեղահանված հայերի իրավունքներին, մասնավորապես ԼՂ-ում հայկական մշակութային ժառանգության պահպանման անհրաժեշտությանը, ինչպես նաև հայերի անվտանգ վերադարձին իրենց տներ։ Ալիևը հայտարարել էր, թե «Եվրախորհրդարանն այդ բանաձևով թիրախավորել է Ադրբեջանին՝ տարածելով զրպարտանք և սուտ»։
Ալիևի ելույթից հետո Եվրախորհրդարանի նախագահը ելույթի իրավունք է խնդրել ու արձագանքել Ալիևի հայտարարությանը։
«Եվրոպական խորհրդարանն ուղղակիորեն ընտրված ներկայացուցիչներով ժողովրդավարական մարմին է, որի բանաձևերն ընդունվում են մեծամասնության քվեարկությամբ և դրա արդյունքները, գուցե, անհարմարություններ են ստեղծում շատերի համար, բայց մենք երբեք չենք փոխի այն ճանապարհը, որով շարժվում ենք և կպաշտպանենք դիրքորոշումները, որոնք ընդունում ենք»,- ասել է Մեցոլան։
