Հայաստանի կառավարությունից հայտնում են, որ վարչապետ Նիկոլ Փաշինյանը ներկա է գտնվել Էկոպարեկային ծառայության Տավուշի մարզային վարչության բացման հանդիսավոր արարողությանը։ Ողջունելով ներկաներին՝ վարչապետը նշել է, որ Տավուշը հանրապետության երկրորդ մարզն է, որտեղ տրվում է այս ծառայության աշխատանքի մեկնարկը՝ հաջորդելով Սյունիքին։ Ըստ երկրի ղեկավարի՝ այս շարունակական գործընթացը նոր փուլ է նշանավորում Հայաստանի էկոմիջավայրի և բնապահպանական ընկալման տեսանկյունից։
Նիկոլ Փաշինյանն իր խոսքում ընդգծել է խորհրդանշական մի փաստ. եթե դժվար ժամանակներում անտառն է մեզ պահել, ապա հիմա եկել է ժամանակը, որ մենք պահենք մեր անտառը, բայց արդեն բոլորովին այլ տրամաբանությամբ։ Նրա դիտարկմամբ՝ անհրաժեշտ է փոխել հանրային գիտակցությունը և ընկալել բնությունն ու անտառը որպես անգնահատելի հարստություն, որի պահպանությունը կարող է միլիարդավոր դրամների եկամուտ բերել պետությանն ու ժողովրդին՝ հատկապես զբոսաշրջային մեծ հոսքերի շնորհիվ։ Այս համատեքստում վարչապետը կարևորել է ենթակառուցվածքների զարգացումն ու ներդրումների ապահովումը՝ շեշտելով, որ մենք պետք է վերադարձնենք մեր պարտքը բնությանը, որպեսզի այն մեզ ավելին վերադարձնի։
Անդրադառնալով ապօրինի ծառահատումների և որսագողության խնդիրներին՝ Նիկոլ Փաշինյանը շեշտել է, որ այս հարցում կոմպրոմիսներ լինել չեն կարող։ Նրա խոսքով՝ Էկոպարեկային ծառայության ստեղծումն իմաստազուրկ կլինի, եթե խնդիրը հստակ չձևակերպվի և իրավախախտումներին չլինի համարժեք ու կոշտ պատասխան։ Վարչապետը հավելել է, որ արտաքին տեսքի ու տեխնիկական համալրման հետևում պետք է լինի իրական նվիրվածություն և ծառայություն, որպեսզի այս կապիտալը պահպանվի ու փոխանցվի սերունդներին։
Այնուհետև վարչապետին են ներկայացվել ծառայության տեխնիկական և մարդկային ռեսուրսները։ Տավուշի մարզային վարչությունը համալրվել է 33 նոր ծառայողական պիկապներով, որոնք կահավորված են ժամանակակից մոբայլ համակարգերով, իսկ դրանցից 20-ն ունեն նաև հակահրդեհային հագեցվածություն։ Ծառայության 128 էկոպարեկներն ապահովված են նոր համազգեստով, տեսանկարահանող սարքերով և պլանշետներով, որոնք թույլ են տալիս իրավախախտումների վերաբերյալ արձանագրություններն ավտոմատ կերպով կազմել։ Էկոպարեկները զինված են նաև ծառայողական անհրաժեշտ այլ միջոցներով՝ ձեռնաշղթաներով և մահակներով։
Ամփոփելով՝ Նիկոլ Փաշինյանը շնորհավորել է աշխատանքի մեկնարկի առիթով և հույս հայտնել, որ այս բարեփոխումների արդյունքները տեսանելի կլինեն արդեն մոտ ապագայում։
