Ռուսաստանն ավելացրել է բեռնատարների վարորդների ժամանակավոր կացության ժամկետը․ նրանք կկարողանան ՌԴ-ում գտնվել տարեկան մինչև 180 օր։ Ռուսաստանի կառավարության համապատասխան որոշումը հրապարակվել է իրավական լուրերի պաշտոնական կայքում և ուժի մեջ կմտնի հունիսի 30-ից։
«Անկախ պետությունների համագործակցության անդամ երկրների, ինչպես նաև Վրաստանի այն քաղաքացիների համար, որոնք միջազգային ճանապարհային տրանսպորտով զբաղվող պրոֆեսիոնալ վարորդներ են և Ռուսաստանի Դաշնություն են ժամանել առանց վիզայի, ՌԴ-ում ժամանակավոր գտնվելու ժամկետը մեկ օրացուցային տարվա ընթացքում ավելացնել մինչև 180 օր», - նշվում է որոշման մեջ։
Նշվում է, որ որոշումն ուժի մեջ է մտնում հունիսի 30-ից: Ավելի վաղ Ռուսաստանում սահմանվել էին միգրացիոն նոր կանոններ, ըստ որոնց՝ ՌԴ-ի հետ վիզայի ռեժիմ չունեցող երկրների քաղաքացիներին թույլատրվում էր օրացուցային տարվա ընթացքում երկրում գտնվել մինչև 90 օր:
Հայաստանում բեռնատարների վարորդները պարբերաբար բողոքի ակցիաներ էին անում՝ կառավարությունից պահանջելով համագործակցել ռուսական կողմի հետ և փոխել այդ որոշումը, քանի որ 90 օրը չափազանց կարճ ժամանակահատված է՝ հաշվի առնելով, որ Վերին Լարսի անցակետը տարվա ընթացքում շուրջ 60 օր փակ է լինում եղանակային վատ պայմանների պատճառով:
