Առաջիկայում կայանալիք առաջին ԵՄ-ՀՀ գագաթնաժողովին ընդառաջ՝ Եվրոպական հանձնաժողովի Եվրոպական քաղաքացիական պաշտպանության և մարդասիրական օգնության գործողությունների գլխավոր տնօրինությունը (DG ECHO) և ՀՀ Ներքին գործերի նախարարությունը ստորագրել են վարչական պայմանավորվածություն՝ քաղաքացիական պաշտպանության ոլորտում համագործակցության վերաբերյալ։
Հայաստանում ԵՄ պատվիրակության մամուլի հաղորդագրության համաձայն՝ փաստաթուղթը «նշանավորում է կարևոր առաջընթաց աղետների դիմակայության բարձրացման ուղղությամբ» և «բացում է քաղաքացիական պաշտպանության ոլորտում համագործակցության նոր փուլ՝ ամրապնդելով արտակարգ իրավիճակների ժամանակ արձագանքման կարողությունները, տեղեկության փոխանակումը և կարողությունների զարգացումը»։
Վարչական պայմանավորվածության հիմնական ուղղություններն են․
- Արտակարգ իրավիճակներում տեղեկատվության փոխանակման ուժեղացում՝ աղետներին արագ եւ համակարգված արձագանք ապահովելու նպատակով.
- Փորձագիտական կարողության եւ լավագույն փորձի փոխանակում՝ թույլ տալով կողմերին միմյանցից սովորել եւ բարելավել աղետներին պատրաստվածության ապահովումը.
- Մասնակցություն համատեղ վարժանքներին, սեմինարներին եւ աշխատաժողովներին,
- Աջակցություն աղետների ռիսկերի կառավարման բոլոր փուլերում՝ կանխարգելումից և պատրաստվածությունից մինչև արձագանք և վերականգնում։
«Սույն վարչական պայմանավորվածությունն արտացոլում է Հայաստանի հետ մեր ամուր գործընկերությունը։ Այն հիմք է ստեղծում քաղաքացիական պաշտպանության ոլորտում առավել սերտ համագործակցության եւ համատեղ վերապատրաստման համար»,-միջոցառման շրջանակում նշել է DG ECHO-ի գլխավոր տնօրեն պարոն Մաչեյ Պոպովսկին:
Նա հավելել է, որ ԵՄ-ի՝ առավել կայուն եւ դիմակայուն քաղաքացիական պաշտպանության համակարգ կառուցելու գործում Հայաստանին աջակցելու հանձնառությունը շարունակական է, ինչը նպաստում է ոչ միայն Հայաստանի, այլեւ ավելի լայն իմաստով տարածաշրջանային անվտանգությանը
