Տուապսեի ծովային տերմինալում բռնկված հրդեհը տեղայնացվել է, իսկ բաց այրումը՝ լիկվիդացվել. այս մասին հայտնել է Կրասնոդարի երկրամասի օպերատիվ շտաբը: Շտաբի փոխանցմամբ՝ հրդեհի լիակատար մարման աշխատանքները շարունակվում են, որոնցում ներգրավված է 276 մասնագետ և 77 միավոր տեխնիկա:
Տուապսեի նավահանգստի նավթալցման տերմինալը բռնկվել էր ապրիլի 20-ի գիշերը՝ ուկրաինական անօդաչու թռչող սարքերի հարվածից հետո: Ուժգին հրդեհի հետևանքով քաղաքում կտրուկ վատթարացել է օդի որակը, տեղացել են այսպես կոչված «նավթային անձրևներ»: Միևնույն ժամանակ, ինչպես նշում էր «Агентство» լրատվականը, տեղի բնակիչները դժգոհում էին, որ իշխանությունները գրեթե ոչ մի տեղեկություն չեն հայտնում ստեղծված իրավիճակի մասին և չեն չեղարկել դասերը դպրոցներում:
Միայն երրորդ օրը օպերատիվ շտաբը խոստովանեց, որ Տուապսեի մթնոլորտ են արտանետվում «այրման արգասիքներ, որոնք ապրիլի 22-ին անձրևի հետ թափվել են քաղաքի վրա՝ մակերևույթներին առաջացնելով սև փառի էֆեկտ»: Քաղաքի որոշ թաղամասերի բնակիչներին խորհուրդ է տրվել սահմանափակել բացօթյա գտնվելու ժամանակը և չբացել պատուհանները:
Ապրիլի երկրորդ կեսին անօդաչուները երկու անգամ հարվածել են Տուապսեի նավահանգստին, որի տարածքում գտնվում է նավթավերամշակման գործարանը՝ կազմելով ծովային տերմինալի հետ միասնական արտադրական համալիր: Ապրիլի 16-ի գիշերը տեղի ունեցած հարձակումից հետո տերմինալը նույնպես բռնկվել էր, և հրդեհը հաջողվել էր ամբողջությամբ մարել միայն ապրիլի 20-ի ցերեկը: ԱԹՍ-ների հարվածի հետևանքով նավթամթերք էր արտահոսել ծով և Տուապսե գետը:
Ապրիլի 20-ին օպերատիվ շտաբը հայտնել էր, որ գետի վրա տեղադրվել են 750 մետր երկարությամբ լողացող պատնեշներ (բոնային արգելապատնեշներ) և նավթամթերքի հավաքման հատուկ սարքավորումներ: Սակայն ապրիլի 24-ին՝ արդեն երկրորդ հրդեհից հետո, տեղի բնակիչները սոցցանցերում գրել են, որ «պաշտպանիչ կառույցները շուտով չեն դիմանա»՝ պնդելով, թե նավթամթերքը բահերով մաքրում է ընդամենը չորս հոգի, իսկ «քաղաքապետարանի կողմից ոչ մի օգնություն չկա»:
