Ներդրողները մոտ 760 միլիոն դոլար արժողությամբ խաղադրույք են կատարել նավթի գնանկման վրա՝ Իրանի արտգործնախարարի կողմից ուրբաթ օրը Հորմուզի նեղուցի բաց լինելու մասին հայտարարությունից մոտ 20 րոպե առաջ։ Սա աշխարհի ամենաշատ վաճառվող հումքի վերաբերյալ հերթական խոշոր գրազն է, որն արվել է Մերձավոր Արևելքում պատերազմի ընթացքում հնչող կարևոր հայտարարություններից առաջ:

Վերջին ամիսներին իրականացված խոշոր և ժամանակային առումով հստակ հաշվարկված գործարքները մտահոգություն են առաջացրել ԱՄՆ օրենսդիրների և իրավական փորձագետների շրջանում առ այն, որ պատերազմի և դիվանագիտության շուրջ ընդունվող որոշումները որոշ թրեյդերների կարող են առավելություն տալ անկայուն և անթափանց ածանցյալ գործիքների (derivatives) շուկաներում:

Ըստ LSEG-ի տվյալների՝ GMT ժամանակով 12:24-ից 12:25-ի սահմաններում ներդրողները վաճառել են ընդհանուր առմամբ 7,990 լոտ Brent տեսակի նավթի ֆյուչերսներ: Ելնելով այդ պահին գործող գնից՝ այս գործարքների արժեքը կազմել է մոտ 760 միլիոն դոլար:

GMT ժամանակով 12:45-ին Իրանի արտգործնախարարը X-ում (նախկինում՝ Twitter) գրառում է կատարել, որ բոլոր առևտրային նավերի անցումը Հորմուզի նեղուցով հայտարարվում է ամբողջությամբ բաց՝ հրադադարի մնացած ժամանակահատվածի համար՝ Լիբանանում հրադադարին համահունչ:

Այս հայտարարությունը հաջորդող րոպեների ընթացքում հում նավթի գինը նվազեցրեց մինչև 11%-ով:

Նախորդող դեպքերը

Reuters-ը հայտնել էր, որ.

• Ապրիլի 7-ին՝ ԱՄՆ-ի և Իրանի կողմից երկշաբաթյա հրադադարի մասին հայտարարությունից ընդամենը ժամեր առաջ, կատարվել էին շուրջ 950 միլիոն դոլարի խաղադրույքներ:

• Մարտի 23-ին՝ ներդրողները 15 րոպեում վաճառել էին 500 միլիոն դոլարի նավթ նախքան ԱՄՆ նախագահ Դոնալդ Թրամփի հայտարարությունն այն մասին, որ նա կհետաձգի հարվածները Իրանի էներգետիկ ենթակառուցվածքներին, ինչը հանգեցրեց նավթի գնի 15% անկման:

ԱՄՆ Ապրանքային ֆյուչերսների առևտրային հանձնաժողովը (CFTC) հետաքննում է նավթային ֆյուչերսների մի շարք գործարքներ, ներառյալ մարտի 23-ի և ապրիլի 7-ի գործարքները, որոնք կատարվել են Թրամփի կողմից Իրանի պատերազմի հետ կապված քաղաքական կտրուկ փոփոխություններից անմիջապես առաջ, հայտնել է հարցին տեղյակ անձը չորեքշաբթի օրը․ հայտնում է Reuters-ը