DW-ի ռուսական ծառայությունը հայտնում է, որ Ռուսաստանը և Ադրբեջանը պայմանավորվել են 2024 թվականի դեկտեմբերին Ակտաուի մոտ տեղի ունեցած ավիաաղետի զոհերի ընտանիքներին և տուժածներին փոխհատուցումներ տրամադրելու շուրջ, երբ ռուսական ՀՕՊ համակարգը խոցել էր AZAL ավիաընկերության ինքնաթիռը: Երկու երկրների արտաքին քաղաքական գերատեսչությունները չորեքշաբթի օրը՝ ապրիլի 15-ին, հրապարակել են համատեղ հայտարարություն, որը հիմնված է Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի՝ 2025 թվականի հոկտեմբերի 9-ին Դուշանբեում կայացած հանդիպման պայմանավորվածությունների վրա: Վճարումների կոնկրետ գումարներն ու պայմանները փաստաթղթում չեն բացահայտվում:
Բաքու-Գրոզնի չվերթն իրականացնող Embraer 190 ինքնաթիռը կործանվել էր 2024 թվականի դեկտեմբերի 25-ին՝ ղազախական Ակտաուի մերձակայքում: Ինքնաթիռում գտնվող 67 մարդուց զոհվել էր 38-ը: Ռուսաստանն սկզբում հերքում էր իր ՀՕՊ-ի առնչությունը, իսկ «Ռոսավիացիան» պատճառ էր անվանում թռչունների հետ բախումը: Սակայն բեկորների վրա հայտնաբերվել էին զենիթային հրթիռի բեկորների հետքեր:
2024 թվականի դեկտեմբերի 28-ին Պուտինը զանգահարել էր Ալիևին և ներողություն խնդրել այն բանի համար, որ միջադեպը տեղի է ունեցել «Ռուսաստանի օդային տարածքում»՝ չհիշատակելով ՀՕՊ-ի դերը: Ալիևն այնուհետև մեղադրել էր Մոսկվային ճշմարտությունը թաքցնելու փորձի մեջ և պահանջել «մարդկային վերաբերմունք»՝ մեղքի ընդունում, մեղավորների պատժում և լիարժեք փոխհատուցում:
Դուշանբեի հանդիպման ժամանակ Պուտինն ընդունել է, որ աղետը հրահրվել է «ուկրաինական անօդաչուի թռիչքով» և ՀՕՊ համակարգի «տեխնիկական անսարքությամբ»: Նրա խոսքով՝ երկու հրթիռ պայթել են ինքնաթիռից մի քանի մետր հեռավորության վրա՝ առանց այն ուղղակիորեն հարվածելու:
Այնուամենայնիվ, քննությունը չէր ավարտվել. 2025 թվականի դեկտեմբերին Ռուսաստանի Քննչական կոմիտեն կարճեց քրեական գործը՝ առանց մեղավորներին պատասխանատվության ենթարկելու, ինչն այն ժամանակ լուրջ հարցեր էր առաջացրել Ադրբեջանի ԱԳ նախարար Ջեյհուն Բայրամովի մոտ:
Երկու երկրների ԱԳՆ-ների համատեղ հայտարարության մեջ այժմ ասվում է, որ ձեռք բերված պայմանավորվածությունները «հաստատում են փոխադարձ ձգտումը՝ դաշնակցային փոխգործակցության շրջանակներում հետագա փոխշահավետ համագործակցության կառուցմանը»:
